Ás veces os rapaces non son conscientes dos malabares que fan as familias
para chegar a fin de mes e descoñecen o funcionamento das microeconomías
domésticas. Comezamos esta semana un proxecto que nos achega á actividade
económica cunha primeira parte: a
cesta da compra.
Partimos da vida mesma e adoptamos o rol dunha familia de catro persoas con
dous nenos pequenos en idade escolar cunha soa nómina ao mes. Temos a sorte de
que a nosa casa non ten hipoteca pero si facturas que hai que
pagar e como exemplos tiveron á súa disposición recibos de luz e teléfono. Ademais, teremos que ir ao supermercado (neste caso virtual a través das
webs de establecementos) a procura de
todo o necesario para sobrevivir un mes. A alimentación (saudable por suposto)
e a hixiene serán prioridade pero tamén deberemos contemplar outros gastos e
buscar maneiras de poder aforrar algo. Facendo moitos números comprobaron que non é nada doado.